呔媽專欄#221｜爸爸一個行為保護孩子同理心

同老公傾偈，講開小朋友有同理心、善良，會為自身以外嘅事情動容，會懂得設身處地去憐憫他人，其實係好難得。雖然我兩個仔冇咩特別叻，學科上又平平凡凡，我哋亦冇比佢哋學呢樣補習果樣，而比起香港嘅小朋友更加可以話係超級behind，但佢哋嘅善良同理心，係令我感到欣慰的，教養咗佢哋咁多年總算冇白費。

想響度分享一件事，我聽完覺得好感動，好開心兩個仔有呢個咁有心嘅爸爸。話說早前響香港，有晚晚飯，兩個仔跟朋友去洗手間，返嚟時佢哋同爸爸講，頭先去完廁所，響坑渠度見到隻小雀仔被困，好用力咁不斷拍翼，但渠水一直沖，加上渠蓋一格格封住，逃不出來就快死，兩個仔好不安，唔知點算。

老公聽完，就即刻同兩個仔一齊返去搵小雀仔，同兩個仔講，一定要盡量諗辦法救佢出嚟！坑渠蓋非常污糟又重磅，老公執咗啲紙皮包住，滿頭大汗終於整起咗個蓋，將小雀仔救出，擺咗佢去一個平地，等佢吹乾，可以再高飛。

兩個仔好開心，但又好擔心佢會死，老公就話佢一乾咗呢，就會拍翼飛走㗎喇，唔使擔心。最後佢哋祝福小雀仔平安，快啲精神番就去搵媽媽，然後返回餐廳繼續晚飯。果晚記得佢哋出咗去好耐的，我都唔知呢件事嘅細節。

之後老公同我講，其實小雀仔救出時已經奄奄一息，因為沖落嚟嘅水全部起晒泡，洗潔精嚟嘅，浸咗咁耐，小雀仔應該就快死，但無論如何，一定要盡力救佢出嚟。因為響小朋友眼中，見死不救絕對係件不能磨滅嘅事，會有童年陰影，特別是我兩個仔咁容易傷心。

一直教小朋友，生命在乎過程，只要盡咗力，最後無論結果係點，我哋至少無憾。但如果呢件事發生，爸爸只係講句：由佢死啦，唔會救到㗎喇⋯⋯咁你諗下小朋友以後見到啲慘事，唔會諗要盡力幫手，只會置身事外，事不關己。簡單一件事情，已經可以影響小朋友一生！

聽完老公講呢件事，我覺得我兩個仔咁善良，係因為佢哋嘅爸爸好有同理心，好願意去做榜樣，以身作則。我好同意老公嘅教育方式，希望兩個仔可以保持着呢顆愛心，長大後更有能力時，多點幫助身邊人與事，呢個世界確實好需要愛。