罰你是在教你 學會聽從指示?!

近日有父親因小朋友太難教，對小朋友作出體罰。而當小朋友被罰「跪過馬路」時，被看不過眼既途人報警，成為網上熱話，更推上報章頭條。此事件引起大眾紛紛討論別人應該如何教仔。

對於報導指父親唔肯認錯，老老實實，我真係唔知個父親要向邊個認錯。老土講句家家有本難念的經，本經唔係你念時，你根本無資格去評論別人，更莫講話要佢向邊個道歉，即使要認錯都唔需要向公眾交待吧！當然，我地個法治社會係有規矩既，點罰都唔可以傷害小朋友，咁樣係瘧兒，係犯法的。

別人教仔對與錯，我就唔評論了。反正每個小朋友性格唔同，教法自然唔同，而點樣既教育方式先係最適合自己小朋友呢?

講下我自己吧，兩個仔8歲 同7歲，兩個唔同性格的。7，8年湊仔經驗唔算多，叫做開始摸清佢地既性格，受軟定受硬，用咩方法可以教得好佢地，點樣可以唔勞氣又達到教育效果，我開始掌握到了。

8歲大仔性格善良敏感，細膽易緊張，好小事都可以纏繞佢一段時間，緊張有壓力時佢又有抽動症(即重覆做同一個動作，但不是妥瑞症)。因此呢個仔絕對不能體罰，因為恐懼會留下令佢不能磨滅既陰影。又咁講啦，以佢呢種性格，惡唔出樣，根本唔會激到你要發癲要體罰佢，所以呢個好易教，係要長氣D，有耐性地解釋佢就明白。

我覺得，適當的懲罰，如罰企，罰唔可以玩玩具，或捐走佢最心愛的玩具等等，係可以收效的就不妨一試。相反如果不斷懲罰但轉頭又故態復萌，咁父母們真係需要了解下小朋友犯錯當中原因，尋求更適當既解決方法了。