【妊娠糖尿】新手媽媽如何面對妊娠糖尿病？（下）｜內附1日6餐餐單

妊娠糖尿餐單推介

初初見到妊娠糖尿小冊子內的飲食表，都真係好灰，我鍾意食嘅飯、麵包、生果及甜品，通通都要減量甚至盡量唔可以食，好彩蔬菜是冇限制，可以任食。為咗BB健康，唯有忍～忍～忍～。但唔想往後12個星期唔開心，變產前抑鬱，我就在選擇食物配搭上花點心思。以下分享一下我一日6餐食啲乜啦！

我多數吃一至兩片多士（全麥包最理想，不過街上真係全麥的麵包唔多），加一杯熱檸檬水。另指明最好吃一份肉，我有時會加一塊火腿或烚隻雞蛋。因為1隻全蛋相等如一份肉。

妊娠糖尿也可以食小食，我的第一餐小食：1杯脫脂奶＋3塊梳打餅是最悶的選擇。想食得開心啲，我會以低脂乳酪，加生果及小量低脂粟米片代替，感覺好似食甜品咁，個人都開心啲。

妊娠糖尿飲食上要注意糖分，因此在選擇乳酪方面，記住要選低脂或0%Fat的。個人喜歡Greek/Greek Style嘅乳酪，口感厚身啲杰啲，有食雪糕的感覺，食起上嚟心情都好啲呀！這隻是馬莎的出品都唔錯，$50有找，唔算貴，推介！

妊娠糖尿餐單要求是要滿足5份碳水化合物，及3份肉，另加蔬菜。

我通常會選擇米粉、通粉，烏冬或意粉等，配些魚蛋／魚片／瘦肉／去皮雞肉，跟住烚一大碗菜。調味方面最好盡量清淡，少油少豉油少蠔油之類，建議改用芝麻油、胡椒粉及少量鹽調味。

除咗湯粉，我有時都會整一大碟沙律俾自己嘆，由於蔬菜類不限，可以選自己喜歡吃的蔬菜，加少量生果/果仁，及肉類如去皮雞肉或牛肉等。

在家自製沙律就放心好多，我會先以水浸洗一次，之後再以煲過的水沖洗一次，最後想啲沙律菜爽脆啲，可以再用冰水洗一次呀。而沙律醬方面，要健康唔肥，當然最好用橄欖油溝黑醋啦。

即使有妊娠糖尿也可以吃生果加餅乾或一個小麵包。有時冇乜胃口，我會整個迷你乳酪沙律，加少少生果及堅果類，又一餐。

同家人一齊同枱食飯，自己盡量多菜少肉，配平碗白飯一碗，調味盡量不加糖或少糖少鹽。

有時真係食唔落咁多嘢，可飲杯脫脂奶或吃個生果便算了。

這段時間，我大部份時間都好跟指示食嘢，但有時人總有惰性及鬆懈的時間，又或有朋友相約街外用餐，其實個人認為一餐半餐也不需要太執著，知道要出外用餐的前一兩天，自己真係檢點啲，食得清淡啲，仲check住血糖，不過我的話，我會俾自己偷偷吃點甜品，如班㦸或一件小蛋糕，平衡一下心理嘛！哈哈。

捱過了這段日子，就當自己減肥節食吧，當初25周開始，真係見自己肥得好快，好似每兩三日就重一磅咁，都真係有啲擔心，依家戒咗口，將近生了，增磅大約25-27磅，都算OK不過重吧！