2555日爸爸

剛剛同遲仔慶祝七歲生日。
屈指一算，即係做左七年爸爸。

七年，即係2555日。究竟呢2555日係點過嘅呢？
慶幸一直有影相、有寫blog，呢七年裡面嘅回憶，印象深刻，仲可以慢慢回味。

做左爸爸，要兼顧工作同照顧家庭，相比起未做爸爸之前真係好累好累。
但係，當有機會做爸爸，卻有意想不到的收穫。

做左爸爸，有機會陪伴同見證子女的成長過程，讓我有機會再經歷一次童年！
當陪伴子女去公園玩、一齊玩LEGO、一齊玩天下太平、一齊玩BARBIE、陪佢地玩煮飯仔、佢地扮醫生時我扮病人、佢地扮侍應時我扮食客、陪佢地睇好多我細個時都無睇過0既經典童話故事、陪佢地一齊唱兒歌、陪佢地一齊玩一齊癲...

有機會做番童年的活動，其實係幾自由自在無拘無束！若果唔係做左爸爸，都幾難有機會咁樣玩，咁樣癲！

當要為子女計劃供書教學...當學習如何管教子女...當子女每事問「為什麼？」時...

與兩隻小鬼0既互動，一直在衝激我，讓我重新去面對生命中什麼才是最重要、什麼才是正確...當我自己正在為人生的下半場努力拼搏時，可以還原基本步。

一直都覺得，做父母的，為子女付出很多，犧牲很多。不過，子女的出現亦為父母帶來很多很多。所以，好想趁住呢個機會，同我家兩隻小鬼講聲：爸爸真的多謝你地！
各位爸打媽打朋友，湊細路的確係會令人身心俱疲的，但緊記，好好享受當中的得著！