我哋教育小朋友一定係着重於讚賞同鼓勵，因讚美中長大嘅孩子會活得自信，思想又正面。但近年教育方針趨向瘋狂學習，好多小朋友細細個，響學科成績，樂器同運動方面，已經叻無可叻，加上父母不停稱讚，令小朋友喜歡同人比較，容易自滿，甚至自大。讚又唔係，唔讚又唔係，咁我哋應該點樣去取個平衡，同埋應該點樣去讚賞佢哋呢？

我覺得教導同賞罰，係同一件事嚟，係需要一同進行。簡單舉個大家身邊時有發生嘅例子，你就明白你唔可以只讚不教，或只罰不教。例如，有個小朋友佢響學校成績彪炳，常獲老師稱讚。10樣課後活動，英文數學、畫畫彈琴、游水空手道，樣樣皆精。

父母當然以佢為榮，每次講起呢個仔就感覺吐氣揚眉，不停響人家面前稱讚。而呢個被父母捧到上天嘅小朋友，漸漸變得目中無人，事事認叻，對其他小朋友，甚至對自己父母態度好差，令人不願同佢做朋友。呢個係典型我哋常見，「只讚不教」嘅例子。

「只讚不教」令聰明仔變冇品

其實個小朋友都幾無辜㗎！學嘢快，天資聰穎，但父母眼中只着重佢學習表現，不停畀錢報堂，付出嘅就只係送佢上堂嘅車程時間，同埋對好成績嘅讚賞。小朋友學習時間長，連休息都唔夠，父母仲邊有時間去教導佢做人嘅道理。所謂勝不驕敗不屢，如果好好教導品德，呢個小朋友會更加成功，更加討人歡喜。

而「只罰不教」，相信大家見唔少，甚至係自己父母對自己嘅教育方式。上一代嘅人，特別鍾意用打鬧呢種高壓方法去教仔。父母都為生計忙碌，邊有咁多時間慢慢教，最直接最快有效果就係打鬧。佢唔會解釋比你聽點解打你鬧你，通常小朋友係畀父母打到自己醒目，下次唔會再做，咁父母就達到目的喇！

「只罰不教」消磨孩子熱情與意志

上一代就鍾意打，時代唔同喇，而家打仔會坐監㗎！唔打得，咁點教？其實冇解釋哋懲罰，罰完唔教，或者不停踐踏，貶低小朋友自信，我覺得心靈傷害仲嚴重過你出手打佢。近日聽到個朋友仔講，佢從小得唔到父母支持，可以話做任何嘢都係畀佢哋踩，有彈冇讚，搞到佢成長中做咩都好冇心信，覺得自己唔叻，有時唔想衰咗又畀父母鬧，會連嘗試都冇動力。

佢好想聽到父母一句讚賞，可惜咁多年來，即使做得好嘅事情，佢哋都冇為佢驕傲過，佢感覺唔到父母嘅愛，其實好唔開心，係個好大嘅心結。

其實讚又好，罰又好，我相信父母們係出於關心緊張，係愛錫仔女的，只係用錯方式表達，唔知自己果套教法係間接傷害左小朋友。如果父母們都可以賞罰分明，讚完罰完，花時間教導番畀小朋友，爸爸媽媽點解會讚你，雖然叻咗但唔可以驕傲，其他小朋友同樣都付出好多心機去做，能夠盡力已經係好值得嘉許。

教佢明白學習過程永遠畀結果重要，否則佢將來一遇挫敗，就難以面對，欠缺抗逆能力了。同樣地，罰完鬧完小朋友，最重要係同佢事後討論，好好解釋番成件事，否則佢不明所以，轉頭又係重覆犯錯。