呔媽專欄#263｜教仔唔發火知易行難

有句成語叫知易行難，相信做人父母都好明白呢句說話。我哋明知教導小朋友係要有無限耐性，同一句道理係要重覆地講講講，但都唔保證佢哋冇下次。明知發癲發脾氣係冇用，甚至喝罵完佢哋，自己又會好後悔做咗個壞榜樣，但好多時面對小朋友嘅行為，佢哋嘅態度，仍然忍唔住怒火，一點即着！

兩個仔小時候，我好少發火，好驚佢哋留有陰影，覺得媽咪黐線，不可理喻。其實就等同我諗番起我媽咪對我，印象中佢真係冇發過我火，只記得咁多年來，有幾次阿哥勁百厭，可能係打爛嘢之類，媽咪嬲到拎籐條追打佢，佢拉埋我入廁所鎖門，哈哈！或者我媽咪都冇點發癲，遺傳我脾氣同忍耐力唔錯，好少對兩個仔打罵，反而我樣樣嘢都執住嚟講，佢哋驚我又講一大輪。

之前講過，每個年紀階段有唔同教法，如我所講，細個唔打鬧，大個更加唔可以！每個人都有自尊心，特別是正值青少年發育期，你爆佢一次，關係破裂咗，好難修補。好似近排，11歲大仔步入青春期，開始有脾氣，會反叛，會唔想做自己唔鍾意嘅嘢，又要九萬個例子不停說教。點解要大家遷就大家，你樣樣以己為先，唔就人哋，人哋又唔會就你，social life 好重要，可以影響你整個人生，人與人關係唔好又點點點，講到自己都煩，但唔講又唔得喎！

好喇，好似上星期，同朋友一家人食 lunch 同埋走轉 IKEA。大仔唔鍾意食唐餐，但大家興致話想去，佢就開始唔鍾意，黑面。去到餐廳又伏響臺，好似沒精打采咁，我老公最憎，係咪要全部人受你氣？定當你透明先？ 咁以後去食西餐時，你一個正常食，我哋全部伏響臺黑面，你又咩感覺呢？老公見到佢咁，當然又爆喇，大鬧一輪，最後話罰佢 weekend 唔可以玩電腦。

去到 IKEA，大仔一直悶悶不樂，又話唔想再同我哋出街，情願響屋企。我話其實一家人開開心心放假出街，點解會因為你發脾氣，唔想就人哋食唔鍾意嘅嘢，就浪費咗自己嘅假期，如果唔啱食，咪食少啲，一陣見到啱食嘢再食過囉，係咪？全日嬲爆爆，其實蝕低果個係你自己，你要知道你愈發脾氣，我哋愈唔會就你。諗下平時我哋會輪流去食大家鍾意嘅嘢，如果得我哋一家人，爸爸通常都會就你哋，因為你哋返咗 5 日學，放 2 日假，都想你哋開開心心，但你唔好唔記得，爸爸都返咗 5 日工喎！好多時仲加班！而家放假仲要受你氣，講唔講得通先？

其實大仔聽得明，亦認同我，遷就別人係好重要，冇辦法，人類就係群體動物，除非你第時選擇移居深山自己一個人住。同時我哋一直好錫佢，叫佢自己諗番，我哋好多嘢都會遷就佢，佢就話知自己唔啱，控制唔到情緒。佢同我講，學校每個月都有情緒控制導師嚟講呢個 topic，同學們分享自己控制情緒嘅方法，佢話導師教佢哋好嬲時，深呼吸數 10 下。佢話佢啱啱有跟住做，但仲係好嬲咁點？我叫佢由頭背一次乘數表囉，背完都已經過咗啖氣啦，可能仲覺得自己一發脾氣就背數學，咁戇居，好好笑添！

老實講，所有人包括我自己，你第一句就衰聲，我一定唔會順從，鬧就更加唔使傾！所謂己所不欲，勿施於人！明知佢哋青春期啲 hormone 咁刺激，為免受佢哋氣令自己傷身，凡事都要好好地講，平心而論，我相信有道理自然可以講服對方！