做細最幸福

之前睇過一篇人地share嘅報紙文章，講出晒兄弟姊妹響屋企排行，各人會有咩性格，真係講中晒架喎！睇返其實講我自己同阿哥，呔仔同細細嘅性格，都講得好啱。做大，真係有做大嘅風範，做細，又真係好多時都係咁樣！

據文章分析，做大嘅一般比較踏實，做事正直，會照顧小弟妹，比較有家庭責任。而做細嘅一般比較聰明，做事有信心，任性好勝，唔會顧慮太多，有冒險精神。講得好啱喎！哈哈！呔仔細細正正就係咁嘅性格。

因為呔仔出世先，佢所有野都係自己學，無同輩嘅人辦比佢跟，變左好多野佢都會係好穩陣咁去試，唔會亂黎。同埋由於佢係第一個，除非我地教佢，否則佢唔會諗到咁多古惑野，唔同細佬，見到阿哥咁做會比人罰，佢識得避，自然醒水D! 然後到細細出左世，我一直有比佢參與照顧細細，例如拿尿片，拍拍細細心口安撫佢等等，令佢無形中又增加左責任感。

而細細嘅話，佢出世時呔仔1歲3個月大，有哥哥比佢跟足，佢學野係快好多。日日觀察哥哥做D咩，到佢慢慢長大，有能力嘅時候已經識做好多野。細細就真係諗野轉數快D，成日搶答架，有時我地都未講完句野佢已知你講咩。同埋佢好踴躍嘗試，唔怕失敗，特別是學講野時，佢啱唔啱都講左先！唔會怕講錯怕人笑佢就唔講，顯示佢對自己好有信心，係好事。

做細嘅任性一定有，因為細丫嘛！即使我同爸爸唔就佢，老一輩一定要風得風。呢個都仲可以原諒，因為唔係一齊住，點就都有個譜。最至命嘅，係呔仔成日保住細佬！一罰細細，呔仔轉頭就求情，又話想細細陪佢玩，呢樣果樣。有時見到佢地兄弟情深，都想佢地繼續建立呢個感情，即係「哥哥真係救到佢出黎」呢樣野，我諗響佢地童年回憶中係好珍貴嘅！當然我唔係呔仔一求情就放佢，點都企返半個鐘先走得！

做細真係好幸福架！我自己都係做細，都係由細到大有阿哥保護，所以好多時見到呔仔細細感情咁好，大家咁錫大家，真係好開心自己有兩個小朋友年紀相近，一齊成長，童年回憶更加多姿多釆。