吹泡泡

齊齊就快五歲啦，呢位小妹妹，仍然好鍾意吹泡泡。

不論係追住泡泡來拍拍拍，還是自己拎住棒棒來吹吹吹，齊齊都會全情投入，樂在其中。

不過，作為家長，有時又會有啲「怪獸」諗法...

「唉吔，玩吹泡泡玩到咁污糟，成手痴立立，好難清潔架，唔好玩啦...」

當有咁嘅諗法時，會有意無意咁唔俾齊齊玩，或是當陪佢玩吹泡泡時會唔投入，會求其敷衍了事。

但係當見到齊齊玩吹泡泡玩得咁開心時，就會醒一醒，問自己：「點解要為左清潔同善後呢啲小事，而唔俾齊齊去玩，唔俾自己投入去陪齊齊玩呢？」

早前在網上睇到一篇文章「成年人要學：小孩的八個快樂之道」。文中提到其中一樣小孩快樂之道就係「污糟沒甚麼大不了」。從自己的成長經驗中，都試過儘情咁玩下沙、玩下水、赤腳行草地、在草地上碌來碌去...，其實真係好好玩。大人點解要被一點點污糟而攔阻住自己？攔阻住子女呢？

若果因為呢啲小事而拘泥、而顧忌，就有可能讓子女失去玩樂的機會，失去左童年快嘅回憶。

看來作為大人的爸爸，真係要學習放開一點，與子女一同發放童真童玩嘅力量。

「一個個飄來飄去嘅泡泡，可以為愛女帶來歡樂嘅時光，泡泡們，真係唔該晒，多謝你地！」