呔媽專欄#254｜夫妻應否計較誰付出比較多？

剛剛睇到篇文章，覺得幾得意，同大家討論下。文章題目係：沒有公平的夫妻關係。內容大致係講，一段婚姻當中，特別是有小朋友後，不可以執著同計較自己付出幾多。筆者所言，如果要同另一半計較，著實係搵交嗌，而且結婚10幾年已習慣做多，早上照顧好小朋友上學，再返工，放工立即返屋企，又忙一個晚上。應該係好多在職媽媽們嘅寫照吧！自己做牛做馬，服侍全家，買餸洗衫煮飯執屋一腳踢，老公就輕輕鬆鬆攤梳化篤電話等開飯。但筆者因為珍惜呢個家，好愛佢嘅另一半，亦好愛佢嘅小朋友，因此心甘情願將所有責任揹上身，不願跟對方討價還價，同樣講出好多人嘅心聲。

而文章最有趣嘅地方，係筆者最尾一段，大家睇到呢度，應該好多朋友會話: 咩都唔做，踢個衰佬出街啦！然後筆者表明，自己係男人，係老公，係爸爸。我認我衰格，睇到呢句真係笑咗！然後再睇網友嘅留言，同平時清一色鬧老公唔幫手加一大堆怨氣，好唔同，今次係愛錫老婆嘅老公們出嚟相認，相信老婆們大都忍酸不禁吧！

我都結婚快12年了，過去10年，我就係做緊筆者嘅角色，半工作又全職照顧兩個仔。老公做嘢辛苦，照顧屋企大小事務嘅重任當然落響我身上。奇怪喎！我又從來冇諗過要分工，或者計較啲咩，總之自己有氣有力就做，累嘅時候老公自然會補位。如果真係要分，我諗老公係負責娛樂兩個仔，我係負責照顧生活起居。

到近年，我身體開始出現毛病，老公就開始揹起照顧者嘅責任，除咗放假帶兩個仔出街，畀我多休息，佢仲幫我煮埋夜晚餐飯，好感動呀！如果你問我，去維繫一個美滿家庭，係咪真係可以如筆者所講，從頭到尾，只有一方不停付出，因為唔計較，夠愛對方，就會甘心情願做埋對方果份? 我覺得唔work。即使現況可以，但去到某一個時候，關係失去平衡，問題就會出現。婚姻，係兩個人嘅事，唔可以單靠一個人付出去維繫，咁樣好唔健康。

人始終係渴望公平，對感情如是，相信冇人想一直付出而得唔到些少回報吧！反而由一開始，大家都唔去計較去，盡力做，做到累了，另一個有默契地補位，呢啲先係維繫一段健康婚姻嘅長久之策。唔計較當然係好事，但必須要係夫妻相方都唔計較，照顧屋企照顧小朋友，工夫爭住做，大家都唔想對方辛苦，想畀對方休息，憐惜對方，呢種關係，才真正可以白頭到老。