呔媽專欄#274｜在最壞的時間遇上最好的事情

呢兩個月大家留響屋企嘅時間比平時多，有冇發現對小朋友了解多咗，大家關係緊密咗？雖然我本身都係響屋企做嘢，為咗方便湊佢哋，我選擇工作性質將就佢哋返學同課外活動嘅時間。平時係由佢哋放學開始，我照顧佢哋起居，但呢兩個月佢哋停課，真係全日都對住佢哋。早午晚餐，功課學習，陪玩陪睇書陪焗餅，可以話連佢哋去幾多次廁所我都知。

除咗每年放暑假可以咁樣日日對住佢哋，咁嘅日子就已經追溯到兩個仔未返學之前了。而家嘅感覺，真係好似當年，佢哋未返幼稚園前，我會響屋企教佢哋認字，會聽歌，學自理，又諗好多嘢做去花掉佢哋嘅時間，唔畀佢哋成日對住部電視，而家就正正係咁樣。

連老公都 work from home，我哋嘅 family time 真係多咗好多！我覺得呢兩個月，我哋對佢哋認識深咗，有好多平時冇時間或者冇心情留意嘅細節，都了解得到。好似細佬，佢性格好細心，響呢段時間，佢主動話想整 pancake 焗曲奇，我陪佢焗咗一次，雖然失敗了，但佢自己第二日又嘗試整，一手一腳再預備材料，量份量，睇得出佢好有心機，結果成功咗，佢好開心！仲識得每次改良食譜，整自己鍾意嘅味道。

至於大仔，同佢做功課時發現，佢由之前計數好差，變到而家一睇題目就心算得到，就算而家學緊嘅份數都計得好快。有好多次我同佢做題，一步步做，我嗌住佢寫出嚟係錯，點知我計完真係佢寫嘅答案，好多次我話完佢，但原來佢個方法係 skip 咗幾步，答案係啱之後，我都唔敢再挑戰佢喇，哈哈！畀我個感覺好似係一個腦閉塞嘅人突然開咗竅咁，佢而家真係心水清！

長時間教導，當然有勞氣事，但細想一下仔女好快長大，呢段時間往後諗番係好珍貴的。疫情過後，一切如常，佢哋日日返學，我哋又日日返工，只得週末先可以多點時間共聚。既然阻擋不了疫情，不如好好利用呢段時間同仔女互相了解，多點傾聽，其實壞時間都可以有好事發生。

呔媽 facebook page: 騎呢.weak7.卜車呔