呔媽專欄 #246｜教仔要耐性，責罰孩子要堅定不移

今日見到一單新聞，係美國小學一個老師，畀監錄鏡頭影到，佢發現有個5歲學生匿埋響書櫃後面，於是好大力拉跌個學生落哋，然後趁前面另一個老師見唔到，好大力踢咗個學生一下。當然個老師最後被辭退，仲面臨法律起訴。響美國，老師體罰學生係嚴重罪行。

而家香港都已經禁止咗體罰呢樣嘢，但我記得我哋細個，小學時，老師打得啲男同學好甘，次次都斷間尺。你問我覺得學校體罰對學生有冇起作用？打完係咪怕咗你，會變乖？係完全冇用。教育從來係心靈改造，體罰呢啲表面嘢，只會令人遇強愈強，愈打愈唔怕你，何況百厭嘅學生，點會怕畀人打，又唔係真係可以打到佢入醫院。我當然唔贊成體罰，打完自己手痛，又冇咩實際效益，所以我覺得做老師真係10級偉大！每日對住班學生無限loop，循循善誘，仲唔可以有脾氣，大家真係要尊師重道。

好喇，學校體罰冇用，咁屋企體罰小朋友又有冇作用呢？以我湊咗10年仔嚟睇，真係見唔到有咩效益。教仔唔係講笑，冇得走捷徑，而體罰就係一個捷徑。你唔想花心機花時間去教，諗住打佢佢就聽晒你話，會變乖，呢個叫做捷徑。3幾歲冇還手之力，可能你會見到短暫效益，但呢個絕對係回力標，對小朋友成長性格影響深遠，第時就後悔。

要由零開始教好一個人，真係一個好艱辛既任務。同一樣嘢你教咗無數次，都仲係要繼續教，因為小朋友唔會你講一次就以後記得咁做，所有教言係要不停loop的。我諗大約3-5年，睇你做化喇，會開始睇到成績，開始見到你講過既嘢佢哋會上心，唔使你再提都識得自動波，有自己一套正面思想，咁就叫做成型。我哋做父母，就係要響佢哋成型之前，盡量灌輸正確嘅事物畀佢哋，教佢哋點樣去做一個好人。我覺得頭10年，佢哋未真正接觸外界，都仲係好好教，始終佢哋一係對住我哋，一係對住老師，老師唔會教衰佢，同學又仲戇居居唔會太壞。呢段時間我哋做父母最大責任，真係要畀心機慢慢教，每樣嘢解釋佢哋知，到佢哋入中學，你想哦多兩句都難，已經唔會理你。細時教唔好，觀念唔正確，到青少年期遇到不同誘惑，好易行差踏錯。

咁打又唔得，講又唔聽，點教好？？ 除咗體罰，其實有好多方法去罰小朋友，等佢哋記得自己做錯事會受罰，亦明白獎罰分明既道理。教小朋友一定唔可以懶，你教少一次，佢唔覺有錯，下次又會再做。罰小朋友，好睇佢本身性格，鍾意啲咩、怕啲咩。例如佢好鍾意同其他小朋友玩，佢做錯事，你畀一次機會佢，但講明如果再做，就冇咗weekend一個小朋友聚會，唔會帶佢去。又或者簡單啲，一大班小朋友聚會時佢唔聽話，可以警告一次，第二次就time-out佢，等佢睇住其他人玩，佢冇份。好似我咁，兩個仔細個唔聽話，我會罰企，我覺得好有效。大家要記住你罰得佢，就唔好玩玩下，唔好佢扭兩扭你就「好啦！下次唔好喇！」當冇事。我罰佢哋企，次次都好甘，企到佢哋腳軟。記得有次企咗6個鐘，係因為頭幾個鐘，佢哋仲當冇事，玩玩下響度笑，咁就由佢哋覺得真係畀人罰緊果刻先開始計。

自此以後，我一講罰企，佢哋已經拿拿聲做好自己啲嘢，唔會再令自己受罰，細路其實好醒目。可能你又話，你罰佢，都要佢肯企先得㗎？咁呢個真係睇你平時點做父母，有冇威嚴，佢聽唔聽你講，你有冇道理，亦睇你平時係咪真係用心錫佢，佢哋知你係為罰而罰，定為佢哋好㗎！所以話做父母真係好大學問，大家都係做到老學到老。祝願大家少點勞氣，教仔之路一帆風順。