呔媽專欄#229｜1212 結婚 11 周年有感

2018年12月12日，今日係我同老公結婚11週年。26歲結婚並唔算太早，但對於當年有個可以追夢嘅機會，而我選擇結婚生仔，仲一做就做咗10年全職媽媽呢個決定，依家諗番轉頭其實好勇。不過話說回來，當年如果選擇隻身去紐約闖一番事業，依家又係咪過緊自己所渴望嘅生活呢？年輕時做嘅每一個決定，都可以係勇敢，可以不顧後果嘅，點同依家行出行入都拖住兩個仔。唔會再有「下一步唔知會點」嘅緊張，根本嚟緊幾個月有咩要做已經一早mark好晒，幾冇癮，哈哈！

11年婚姻生活，可能係因為9成時間都要咗嚟湊仔，真係唔覺過咗咁耐。兩個仔長大了，我同老公仲好似冇點長大過，一樣係咩都笑一餐，大細路咁。有時網友會想知，我哋點樣相處，可以結婚咁多年都好似拍緊拖咁sweet。其實我覺得，拍拖同結婚只係身份上唔同咗，相處應該冇分別喎，點解一齊耐咗就一定會唔同？當年其實突然戚起條根話註冊，都係想快啲生BB，咁我又未到話生咗先結婚咁前衛，但結婚嘅原因大概係想要小朋友，所以婚後其實都一直係拍緊拖，一樣係做番拍拖會做嘅事。

而兩個仔嘅出現，令我同老公更了解相方對家庭付出，呢點對於我哋嘅婚姻關係其實好重要。響BB出世後，由於我係埋身全人奶餵，兩個都食咗成年夜奶，餵奶換片自己都好快上手，係長期渴睡。當時我個心就會想盡量自己搞掂BB，半夜發燒病果啲，我唔會叫醒老公，因佢第朝返早，唔想阻佢休息，我覺得嘅然自己搞得掂，又何苦犧牲多個人。老公見到我半夜湊BB辛苦，日頭會盡量幫我湊仔做家務，會叫我休息下，約朋友出去輕鬆下。

咁多年嚟，我哋冇試過推小朋友畀對方湊，反而成日爭住湊，佢就算放工返到屋企，見天未黑都會想帶仔去公園玩陣，放假又會自己帶仔出街，等我可以睡晏啲，補番平日的不夠睡。大家從冇埋怨過辛苦，果種自願犧牲其實好重要，令我哋感情好好。響我身邊朋友中，婚姻美滿的，都係兩公婆唔計較嘅一群，老公會幫手湊仔女，好願意畀老婆們去下短Trip輕鬆下，而老婆們平時又會捨身照顧小朋友，大家都將心思放於家人上。感情係相向，你願意不計較付出，對方知你錫佢，佢會一樣咁錫你，我諗，呢個就係我哋一齊10幾年都仲好似拍拖咁甜蜜咁開心嘅相處方式。