呔媽發現小朋友成日口擘擘、嗡口嗡鼻，未必係整古做怪，可能係抽動症發作

話說大約3年前，大仔響就快上小學嘅時候，開始出現抽動症。一開始時佢重覆擘口動作，大家只以為佢係壞習慣，當然有教佢唔好咁樣，叫佢控制自己。

後來愈來愈頻密，就意識到應該係有唔妥，網上查究，原來有一種神經問題叫“抽動症”(Tic Disorder)，又叫“妥瑞症”(Tourette Syndrome)。當時寫過一篇有關文章，有興趣可去了解一下 >> link：兒童抽動症 。

到而家過咗3年了，唔知係我已經睇慣咗，定佢呢3年來真係好少再出現症狀，還是我啲失憶症又嚴重咗，我真係斷咗片，無咗中間呢段記憶，我覺得佢已經無事。係剛剛暑假尾聲，老公發咗次癲，嚇親大仔令佢精神好緊張，好擔心，然後佢嘅抽動症又出現了！所以話呢，大人唔控制自己情緒，無辜受害嘅就係小朋友！！

好喇，我哋知道抽動症，其實有幾項，有重覆動作，有發聲，有又做動作又發聲咁樣。好彩大仔暫時只係動作症，佢會重覆抽扯頸，到唔扯頸喇，又變番擘大口，到擘少咗喇，又變咗不停索鼻…… 總之就係重覆咁樣做一啲面部肌肉動作。

依家大個喇，唔似3年前啲同學仲傻更更，大家以為扮鬼臉玩，結果返學校，佢話都有同學問佢，做咩不停口擘擘。佢就同同學講，呢啲係壞習慣，同學就話佢呢啲係silly habit，大家講下笑就算，都冇點再理喎！

好彩嘅係外國呢邊，3年級嘅小朋友，仲係比較純品，大仔冇因為咁樣而被欺負或取笑。但我都有教佢，呢啲症狀會慢慢消失的，可能係太緊張就會咁樣，好多小朋友都會，只係大家唔同動作，有啲會搣手指，有啲會眨眼嗡鼻。自己知道問題不大就OK，控制範圍外的，無需介懷。

香港媽咪分享，一齊加油
香港嘅戰友就冇咁好彩喇，近排都有網友搵我傾偈，因佢見我提過大仔有抽動症，佢小朋友又係咁上下歲數，又係有。佢好擔心，好驚影響小朋友成長社交，佢話有位同學媽咪見到佢小朋友咁樣，成日笑佢，搞到好負能量。又問點解佢咁整都唔教佢，唔打佢？

我聽到真係得啖笑，我同佢講，叫個家長讀多啲書先啦！真係同佢溝通唔到，唔識就自己去google啦！不過都唔係文化問題，係人格問題，呢連小朋友都嘲笑嘅人，連對人最基本尊重都唔識。除咗叫佢收聲(可以婉轉啲嘅，不過我唔會)，可以做嘅係自己同小朋友都自強一點，又不是做錯事，做咩要畀人笑畀人講？

要令自己同小朋友都變得正面變得堅強，先可以打勝呢場仗！
(續)