- motherhood
- by 呔媽Kelly
- 16/01/2018
我由兩個仔BB時，已經開始捉緊每個教仔嘅機會。好多人會話，BB咁細個，點會明你講咩？點教都冇用。錯喇，佢哋真係識聽的，只係未識講，但行為上已識表達喜怒哀樂，呢個就係佢哋明白你意思嘅反應了。
教仔如護膚保養，要長期作戰
教小朋友，真係要好多心機，講多一句，講少一句，分別好大的。人哋成日話，世上冇醜女人，只有懶女人，其實啱呀！想自己靚就勤力啲保養，想小朋友好，都係一樣道理，做個勤力嘅父母，教仔唔好懶，一有機會就用例子嚟教仔，解釋一大輪，講到佢明。
可能因為咁，我兩個仔好鐘意問問題，大仔更係不停口講東講西，你以為佢亂噏嗎? 其實我哋每句說話佢都記住，往後你自打嘴巴時，佢會提番你，哈哈！
好似之前大仔參加社區一個關於 Recycle 嘅海報設計比賽(小學組別)，佢第一次自己創作，諗到將回收筒畫成機械人，將回收物品同文字嘅元素加落去。佢問我同爸爸小時候有冇參加呢啲比賽，我哋都有，佢又好似好開心咁，佢好鐘意做我哋細個做過嘅事，覺得好似一個family。
教導孩子着重比賽過程的重要性
完成後，提交當日佢同我講，佢好驚得唔到獎，因為第一名有 100 蚊美金獎金，佢好想儲起呢 100 蚊要嚟第時買車，哈哈！又話如果得唔到獎佢會好失望，覺得浪費咗啲時間，早知唔參加之類說話。我就教佢，其實參加一件事，係享受個過程，結果並唔係最重要。
當然大家參加得，都好希望得獎，但只有 3 個獎，100 人參加的話，有 97 人會失望，但呢 100 人都為自己而努力過，其實已經有得着。就算今次真係失望，但累積咗經驗，下次又再進步啲，唔放棄的話，梗有一次會贏的。雖然係老套到爆嘅說話，但又真係事實呀！然後我搬咗爸爸出嚟，舉咗個有少少深奧嘅例子比佢聽，佢聽完竟然明。
爸爸中學畢業後，做一份維修街燈嘅工作，人工一般，但高危。唐人老闆唔會理安全問題，請你番嚟用到你盡，超時工作冇補水。直到爸爸工作時滑腳由高處墮下，好彩有個大花盆托一托，但個後腦都撼穿咗入急症，休息幾個月後冇再做了。
但亦因為呢份街燈工作，佢認識咗而家呢份工嘅阿頭，阿頭見到佢當年工作勤力又不計較，於是有空缺時第一個諗起呢個年青人，就聯絡當時已準備讀番大學嘅爸爸入去面試，結果一做，就做到而家，11 年了。
我同仔講，如果當初爸爸嫌辛苦，嫌工時長，冇做街燈份工，就唔會識到而家阿頭，亦唔會因此得到一份咁安穩嘅工作。所以呢，你依家做緊嘅野係磨練，累積經驗，唔好一輸咗就覺得啲野做咗係多餘係冇用。呢一刻你可能覺得輸咗，早知唔參加啦，但其實你做咗嘅每件事都係帶領緊你繼續前行，學咗嘅野，將來一定用得着的！
做人目光要遠大，千祈唔好短視，你將來得到嘅野會比呢 100 蚊獎金更有價值呢！
