善意的謊言

我地做父母既，當然要以身作則，做個好榜樣比仔女睇，教佢地做人係唔可以講大話。但其實講大話都分好多種，又有唔同技巧既！

我自己覺得真正既大話係要黎過骨果種。即係講左出黎係有掩飾或者逃避作用，例如唔誠實，推卸責任，或者應承左而又做唔到既事。呢D我會捉得佢地好嚴，自己時刻警惕，應承左小朋友既野一定會盡力做。誠實同責任感對小朋友有好重要既影響。

而另一種，就係我教仔時經常會發生，我覺得俾盡係叫吹水，並唔屬於真正講大話之列。

點解我咁講呢? 因為我家呔仔十分感性。佢太善良喇，善良到令你唔想咁快將殘酷既現實話比佢知，唔忍心去破壞佢果個咁美好既世界。

好似今日，同呔仔細細去超市買燒雞。個架既下層剩返1000零1隻喎！而新鮮燒雞又出緊爐入緊盒，人人企響度等緊。此時呔仔就黎料，問我做咩唔買下格果隻既? 我話想等熱既，果隻凍左媽咪咳緊唔好食凍野嘛！佢話凍左可以返屋企叮熱(咁佢又講得岩喎！)我唯有話新鮮D好食D，呔仔就開始眼濕濕喇(估到佢實係咁)，話果隻無人買，咪好慘囉！猛話不如我地買左佢啦，我唔想要新鮮架！

嗱，此刻我係咪夾左響中間先? 咁我無理由話佢知個事實，果隻因為凍晒就無人要架嘛！平時叫佢要珍惜舊左既玩具，做人唔可以貪新厭舊之類，咪變相自打咀巴！再講，我唔係好講得出口，比佢知道現實就係咁殘酷，人人只會鐘意好既靚既野，我驚佢未明，一陣諗錯晒就麻煩。

但另一方面我又無理由有新鮮熱辣辣既雞唔買，要夾硬買隻硬柴柴架嘛?！響呢個時候，我地需要善意吹水，一個美麗既小故事。我同呔仔講，其實果隻雞雞響度等緊佢媽咪黎接，你睇其他小朋友都走晒喇，剩返佢，如果我地買左佢，咁一陣佢媽咪黎咪搵唔到佢囉！就係咁，呔仔就好放心咁比我買走一隻新鮮既燒雞，而又無再眼濕濕果隻硬柴雞喇，我既說話令佢放下，放低左呢件事。

係，雖然佢會慢慢長大，幾年後發現原來呢世界並唔係媽咪講既咁童話。但我希望佢相信，相信呢個世界仍然有好多美好既事，可能最終硬柴雞真係見返佢媽咪呢！好多野未到最後無人會知結果，有時太執著一樣野，倒不如換換另一角度去諗，學識放下，生活可以過得更快樂！^^