小孩不記別人過，大人呢？

一直都覺得，小朋友既世界好值得我地大人去學習，學習同人相處及寬恕。有無發現，小朋友相處係好單純，佢地有一顆比大人更廣闊既心，好似呢一刻有磨擦互不瞅睬，下一刻又已經攬頭攬頸。特別是我有2個小朋友更覺明顯，發現無論佢地點嘈都好，好快你一句我一句，又笑住一齊玩了。久而久之，我對佢地爭執既行為已經唔會太著緊，更唔會動氣要點樣去處理，轉個頭，兩個又老友返，無需擔心。

但係響大人既世界呢? 唔知係我地自尊心太強，定還是太愛面子，好難同一個人磨擦後，轉個頭又無事，就算之後無事，心裡都或會有件事。同樣，頂頸後好難開口去同對方講對唔住，唔似小朋友咁易開口了。所以有左小朋友之後，睇到自己活在大人既框框之中，就會有所得著，會醒覺點解為左少少事就失去一段好友關係呢? 實在不值得！要提醒自己學習放下。

好似呔仔前日出席一個同學仔生日會，呢個同學仔，呔仔日日放學都投訴佢，話佢吐口水，成日蝦同學，又日日爭排隊。我問呔仔，點解你咁唔鐘意佢，又要去慶祝佢生日呢? 佢話佢係成日做衰野，但一齊玩時好開心,哈哈！小朋友就係咁樣，原來唔會將人地唔好既野成日記響心上，唔會嬲左佢唔同佢玩，無記恨既心。當然我亦鼓勵佢去體諒同原諒，佢做衰野就提醒佢，教返好佢，咁樣大家先會一齊成長，變成好人！生日會當日眼見，成班同學仔玩得好開心，玩到唔捨得走，証明呔仔選擇出席係正確。換轉大人既話，對一個人有介締就唔會出席對方既party吧，所以話，我地都要向小朋友學習， 世界就會變得更快樂，更可愛了！