小時候忍讓是美德，但長大後必須懂得保護自己，才可以保護身邊的人……

做父母呢個角色，其實幾難掌握，我自己好多時會思前想後，決定唔到應該畀一個點嘅世界我兩個仔接觸。你哋有無試過，當小朋友有事發生時，你猶疑應該教佢以一個點樣嘅心態去面對？

好似大仔細個剛開始返幼稚園，playtime時佢自己拿住一個膠桶玩沙，轉頭畀同學仔搶咗，換咗一個爛的畀佢，佢冇理照樣開心咁玩。我響隔離睇到冇出聲，因我覺得佢自己可以handle，4 歲仔有咁嘅氣量亦唔介意蝕底，我唔會專登教佢要搶番自己嘅野，或一定要用靚的。我反而教佢嘅係知足常樂，爛嘅一樣好玩，而成日吼住人哋靚野嘅人，佢成長心態唔好，就算自己有幾好嘅野都唔會滿足，咁樣做人唔會開心。

小時候被搶玩具忍讓
4歲仔我咁樣教，但我有問自己，8歲呢？12 歲呢？係咪都係由得人搶？而你知道上小學後，欺負你嘅人係會激增的，你唔去自保，就會變成弱者了，即使你心態上其實唔介意畀人搶嘢。因此我覺得響兩個仔慢慢長大時，要開始滲啲現實生活畀佢哋知道下，始終係仔，將來要保護到身邊嘅人，不能啞忍欺凌。

話說大仔有個同學，因為大仔唔聽佢支笛，佢開始好 mean，你知啦，有啲小朋友係好鐘意做 leader，個個都要聽佢講嘢，而大仔比較自我，有自己一套，唔鐘意 under 你。就係咁，呢個同學有次唔知因咩事打咗大仔塊面一拳，不是重拳但都有痛。大仔當時有教育佢，但個同學話唔 care，即係冇悔意不受教。

教兒子畀人打要即時還手
大仔放學返嚟同我講件事，佢話冇同老師講因為唔想搞大。當晚我有 email 老師等佢知道有件咁嘅事，第二日老師召喚有關同學，對方有道歉，事件解決咗。呢個情況，我又會覺得，係咪我教得個仔太善良呢？於是事後討論時，我哋教兩個仔，如果下次有人打你，只要係對方先出手，冇論任何原因，你必須即時還手！我哋覺得係時候劃條底線畀佢哋，等佢哋清楚知道，唔可以企響度畀人打，要學識保護自己！加上對方覺得打你唔還手，就會一直欺負你，呢個係事實。

細仔試過 2 歲時去 playhouse 玩，有個大大嚿墨西哥仔係咁迫佢埋牆恰佢，佢推咗對方落哋坐響佢上面打佢。我其實覺得佢做得好啱，畀人迫埋牆，反抗係自然反應，但我又無理由鼓勵佢咁樣做喎！你話喇，我呢個角色係咪好矛盾？

細仔小時候出手打人被制止
咁我當時就教佢，有事要即刻走黎同大人講，等我哋幫手解決，因為只係得 2 歲，唔想佢以為暴力可以解決問題。經我哋不停教育，亦受到善良大哥影響，細佬嘅戾氣消失了。

經過大仔畀人打唔還手此事，令我明白原來小朋友一直成長，我哋嘅教法亦同樣要跟住成長。即係我唔可以用教 2 歲教 4 歲時嘅方法，一直沿用到 8 歲 10 歲，因為要面對嘅環境同人事都複雜了，自我保護性亦應該相對提高。

做父母真係好多矛盾位，既想保存佢哋純真性格，但又要畀佢哋知道現實生活中有事發生時要點反應，唔知大家係咪都有遇過呢啲情況呢？而大家又會點樣面對呢？

呔媽其他專欄：