当番表

 自從上年當選咗學校嘅PTA主席後，真係冇啖好食，唔係忙呢樣就忙嗰樣，每個月又要開會。以為做完PTA主席，今年就有好日子過啦！原來又唔係（泣）。因為今年我又被選中成為村內兒童會嘅會長，所以一樣忙個不停。

除咗在夏祭或其他村內的大型節目時，兒童會會長要做搞手，親力親為外；會長每個月嘅職責之一，就係要編制家長帶隊返學同放學嘅「当番表」（當值表）。編好当番表後，就按村內有兒童嘅家庭數量影印，再分派俾每個家庭。呢個工作都唔容易呀，如何分派呢？

▼　首先做一個回覽快勞，將影印咗嘅当番表，放入快勞裏面。

▼　快勞裏面貼上表格，上面寫着各個家庭嘅姓氏。家長收到快勞後，自行取一張当番表，然後喺自己個名下面寫番收件日期，再按回覽路線將快勞交俾下一位家長。寫日期嘅目的係方便我知道，邊個家長hold住個快勞唔交俾下一個家長之餘，亦可以参考回覽日數，預番啲時間做嘢，哈哈！

按照經驗，回覽日子比較長，所以我將人數分得少啲，希望個個可以快少少收到当番表。

▼　呢張就係我整嘅当番表喇，有晒姓名同電話，先後次序全部順住拼音落，完全公平。

如果家長當值日唔得閒或有要事，就要自行同朋友調時間，絕無走雞，個個公平！如果咁啱當值日打風或者落狗屎，都要硬食照企，即係睇你好彩定唔好彩啦！（笑）

▼　好喇，上兩個星期晨咁早，就輪到我負責帶隊返學嘞。

首先，按当番表上指定時間到達現場，之後同另一位家長齊齊企喺返學沿途嘅危險地帶，幫手睇車同帶小朋友過馬路，順便睇住佢哋有冇作反。遇到啲曳學生就要出口提點，但都唔係個個合作㗎，所以都幾勞氣！

因為上年當過PTA主席嘅關係，有好多學生都知我啲辣嘢，所以有啲曳學生每次老遠見到我個影，都會即刻變乖（爆）。

原因係，佢哋知我鍾意影相同寫報告俾先生（爆）……

冇辦法啦！因為我又唔知佢哋叫咩名，有相有證據，佢哋一定冇得反口吖嘛（´益`）hehe...

教自己嗰個都勞氣，教人哋嘅更勞氣，但教好小朋友係大人嘅責任，希望佢哋長大成人後，唔好走嚟向我發爛渣就好喇（爆）。

因為當日學校回收鋁罐嘅關係，學生除咗要孭住大書包之外，仲要攞住一袋二袋。佢哋要行兩公里，真係幾禾味……

▼　帶完隊返學，我就跑番上車，寫番個帶隊記錄。

曳嘅小朋友要話，乖嘅、識打招呼嘅要讚，咁先公平㗎嘛！

▼　下圖為參考例子。

▼　最後步驟：將當值嘅所有用品放回当番袋內，交俾下一位當值嘅家長。当番袋裏面有我畫嘅地圖，唔識路嘅家長請參看地圖啦！

喺日本，小學生要自己行路返學，目的係要訓練佢哋獨立，不論打風落雨，日日如是。但返學路程長，途中有唔少危險地方，例如冇燈位嘅馬路，所以我哋做家長嘅就要諗方法，確保小朋友安全。學校只會做好教育處指示嘅嘢，至於小朋友點樣返學放學，就係各位家長嘅責任喇。