從小聽道理

呔仔細細嘅出現，令我呢一個由細到大都唔講道理嘅人，變成而家日日將一堆一堆做人嘅道理掛響嘴邊。原因係咩? 因我好清楚任性係會令人撞好多板，我嘅人生係不停撞撞撞，所有要明白嘅事理都係自己撞返黎。當然，小朋友總有佢自己要經歷嘅人生，但做父母既，行過邊 D 曲折路，可以嘅話梗想佢避開下嘛！再講，教得佢懂事，最直接受惠嘅係自己，你嘅湊仔生涯會輕鬆好多，又開心好多。

好多人以為，小朋友細細個唔明大人講咩，所以唔使同佢地講道理。錯喇！其實佢地完全明白，心水清過你同我！係未識講野咋，其實一早已經用行動表達你知，佢地咩都明。佢肚餓痾左尿識喊識唔開心，你引佢佢識笑識開心，佢知佢扭計你會抱佢，證明佢開始明白 cause and effect，而「講道理」呢樣野，根本就係 cause and effect。所以，由佢地開始對事物有反應，已經可以同佢地講道理架喇！當然，唔係講 D 好深奧好長篇大論嘅野，而係用返佢認知嘅事物去解釋，容易淺白。

早在呔仔細細一歲左右，我已經係不停講，每樣野都解釋再解釋，用簡單嘅例子、事件去分析個嚴重性比佢地聽。唔好諗住講一次會明，如果講十次佢真係明白，已經偷笑了。第十一次，佢開始唔做同一樣野，又或者你一提佢就醒水，你就知道你果十次口水無白費了。(然後，我深深明白，點解每個阿媽都咁長氣！XD) 我深信好多野係在於基礎，個底打得好，以後教仔就輕易得多。

舉2個朋友們曾經問過我嘅例子：

1) 輕鬆帶佢地搭飛機。即使別人認為講極唔明，最難攪嘅2、3歲年紀，我可以一拖二帶佢兩個搭十幾個鐘返香港，完全唔扭唔嘈，仲幾 enjoy。點解唔扭計呢？唔係佢地天生乖巧，幾乖嘅小朋友你唔比心機教或者用錯教法，一樣變壞。佢乖佢聽你支笛，其實係你付出左自己唔知，或者已經身教了。所有你見到嘅「果」都係你自己種嘅「因」。講返先，搭飛機係件大眾事，機上咁多人要休息唔係得你一個，又扭又嘈又坐唔定就會影響到人，將心比己，你休息時又鍾意被人嘈嗎? 只顧自己而妨礙別人嘅話叫自私，呢 D 道理，就係要靠從小講起喇，唔係搭飛機果十零個鐘佢會忽然明白的。

2) 唔扭買玩具。基本上每一次去 Toy Shop 都係睇玩具，而睇玩具亦已成為佢地嘅娛樂之一。佢地好明白除非特別日子或外遊，否則唔會無啦啦買玩具。見過好多小朋友扭買玩具喊，一喊父母就話買啦買啦，一唔係就搵其他野引佢，情願買糖買雪糕，再唔係就抱起夾佢走。其實好應該趁呢 D 機會講道理，正正經經講，講幾多次都要講，解釋比佢聽點解唔買，父母搵錢辛苦呀，買呢件玩具大人要做幾多個鐘頭工作，又或者舉例講買呢件玩具嘅錢，可以有咩其他更有意義嘅用途等等，比佢知道 D 錢唔買玩具，可以儲起佢更好地運用。

我地屋企有個規矩，就係扭計呀喊呀永遠唔會得到你想要嘅野！反之，你扭計只會得到懲罰 (要收效就要企硬了，唔好有一次係佢扭計你心軟，比佢扭到，個規矩就無力架喇！) 久而久之，呔仔細細習慣左唔會用扭計去要求，佢地會正常問。當佢要求時，你合理地解釋 (即拒絕啦)，佢地會明白會同意你講嘅野。即使下次再要求，當我話我講過點解唔買時，佢地會記得，識講返個原因出黎架，咁樣已經係明白道理嘅表現，不過問多句又無壞既，搏下我會話可以買丫嘛！哈哈！

總之唔好嫌自己煩，不停講道理不停教，始終一天佢會變成一個懂事嘅小朋友架，飲多兩杯水，加油講道理啦！！