[忌]沉迷自high潮文怨天怨地 [宜]多關顧老公感受全家快樂

上篇文章提到想好好維繫夫妻關係，老婆們不應沉迷自 high 潮文，即係果啲一面倒捧到自己上天，踩到老公貼地嘅放負文章，愈睇怨氣愈大。

其實文章本身 OK 嘅，幫大家女人們抒發下感受，只係有時留言比較偏激，有啲女人會話，BB 係自己陀，自己個肚生出嚟，梗係同自己最親，男人當然唔會着緊之類。正常嚟講好少人會咁諗，其實老婆有咗，男人係好緊張的。常常聽到老婆有咗就做女皇，要錫晒就晒服侍佢地，會心痛老婆陀 BB 辛苦，自己又幫唔到手，老公們好識做的。

但所謂近朱者赤，近墨者黑，睇得多負面言論，本身冇呢個諗法嘅人就可能被影響，如當時感覺灰灰哋，更容易諗埋一邊！唔想家庭氣氛愈嚟愈差，夫妻關係愈嚟愈壞，不如多睇一啲有用同正面嘅文章，學習點樣欣賞同感激另一半，思想正面，生活才會快樂。

感恩朋友鼓勵打氣

幸運地，我身邊大多係正能量朋友！其實大家做父母都辛苦的，照顧小朋友唔容易，但朋友們都將湊仔女視為快樂，珍貴嘅時光，即使遇到不順心嘅事分享，其他朋友都以正面回覆支持。呢啲其實響我哋生活中係非常重要，因為當你無助嘅時候，你需要嘅唔係更多嘅負面埋怨，而係將你由地獄中拉番上天堂嘅聲音。好似我響自己 Facebook 分享對呢種放負文章嘅想法，朋友們嘅留言令我對背後的男人更了解。

原來唔止我，好多朋友都睇到另一半的好，結婚多年仍感激對方付出，好有愛。好認同朋友所講，老婆大肚，生仔餵奶，呢啲辛苦之處人人可見，而小朋友由媽媽湊大嘅話，更會時刻黐住媽媽，理所當然大家都認為媽媽付出嘅時間同心機一定比爸爸多。而老公嘅角色一般係背後付出，為家庭默默耕耘，未必人人察覺到。

父親無形付出值得嘉許

莫講話開口稱讚爸爸，有人會覺得爸爸們平時唔使點湊小朋友，讀書教育方面多由媽媽一手包辦，爸爸確實比媽媽輕鬆得多。但就算別人感覺唔到，做老婆一定會知道老公對自己同小朋友付出，果種緊張，果種愛莫能助，老婆都會好感激有老公呢個強大後盾，累了有個肩膊依靠，激心時有番慰解說話。

多點互相稱讚，其實唔止女人，男人都鍾意甜言。愛係相向的，老婆辛苦想老公錫，老公都一樣，你明白佢多啲，佢又會更加愛錫你，家庭愈見和諧，小朋友亦能快樂成長。