搗蛋背後

間中收到網友私訊，問我關於湊仔教仔問題。意見不是專業，講既都係我自己一向做法，幫到大家當然好，但每個小朋友性格唔同，有時面對大家既無助，我唯有轉做心理輔導，化身社工負責開解對方。

好似琴晚有網友求救，話4歲阿女對新來姐姐態度好差，一不滿就發作喝罵，又不停在家搗亂。此情況持續左一段短時間，罰完企認完錯好像明白，但轉頭又黎料。更嚴重係開始出手打姐姐，第二次了，於是無奈求救。我聽到事件後開始研究，佢脾氣一向係咁? 還是近幾個月開始? 舊姐姐同阿女關係如何? 新姐姐又如何? 網友話阿女好醒目，知道邊個可以蝦，舊姐姐雖不悅，但控制到阿女，而新姐姐就攪佢唔掂了。佢話阿女之前都受控，問題不大，係近來直情失晒控，點教點罰都無用。最後同老公決定用打去阻嚇阿女，暫時收效，但好怕再打會對阿女有陰影，認真頭痛。

我同意以暴制暴唔係好辨法，打得幾多丫?如果打完一次佢以後緊記，咁就OK， 但果次一定要好甘，如果係咁易打下，不如唔好動手。我反而贊成罰企！曾經我都覺得企罰係好無謂既方法，但原來係好work的，因我試過罰仔企足6個鐘，企到佢地驚，以後一提即刻醒定。唔好一聽到6個鐘就覺得我變態，更變態既係，頭3-4個鐘佢地不知覺得幾好玩，完全唔覺比人罰緊，所以我係由佢地開始覺得腳軟，知道比人罰緊黎計，實質企左3個鐘。都係果句，一係唔罰，一罰就要佢地知驚，否則不如慳返啖氣。好喇，結果我就提議罰企，網友話完全無用，因放工已經6點，9點上床，當中又食飯又沖涼，真正企既時間好短，佢都唔驚。我話係由放學企到訓覺，日日企都唔驚咁好耐力?！佢話新姐姐根本控制唔到阿女，全日企唔可行。

然後我問，阿女既壞態度，喝罵係從何而學? 學校還是屋企? 係舊姐姐咁樣罵佢，佢學左? 你都係咁樣對佢嗎? 網友無奈告知，其實阿女既喝罵都學左父母9成..然後開始傾訴，原來早前屋企一時間發生左好多事，令網友同老公心煩又缺睡，舊工人走左果幾個月仲要輪流照顧阿女同細仔，結果好多時會將自己情緒發洩響阿女身上，阿女一搗蛋就忍唔住喝罵。

我聽完明白左，噢！原來係阿女將之前所承受的，發洩響新姐姐身上。我了解後鬆一口氣，起碼我知唔係阿女本性難馴，問題根源係響大人身上，咁就易處理好多。於是同網友講，阿女近來失控行為，極可能係之前成日被罵，情緒太起伏引致。你知啦，我地大人心情好時，忍耐力特強，小朋友搗蛋可以一笑置之，但心情煩燥時，真係講多句都嫌煩，小朋友好易變成出氣袋！但在小朋友角度呢，佢其實同平時一樣，但點解今次會令爸媽大怒呢? 佢地唔會明白大人既情緒，只可無辜硬食，又或有樣學樣搵野發洩。網友係個好媽媽，當我講出問題根源，佢已自責，仲話唔傾過都唔知原來係自己情緒起伏直接影響左阿女。到而家大人處理好家事，但無諗過阿女仍然處於情緒緊張狀態，只睇到佢今日搗亂既果，無諗過之前發生既事因，後悔自己無好好控制情緒,錯了。

我又覺得，同小朋友成長係一個經歷，好多野唔發生過唔知道原來會咁。唔好自責啦，其實大家都唔想，每個人都有情緒失控既時候，而家知道問題所在，同阿女傾返，比返信心阿女，相信大人態度改善後，阿女一定會被開心家庭既氣氛感染的！加油呀！希望呢篇文章幫到大家，仔女搗蛋時諗一諗背後原因，問題根源好可能係源於自己呢！