無啦啦畀人偷咗螢光筆，對方冇被罰之餘，仲可以一齊用？

有網友發現，我好少寫關於細仔的事。細仔8歲幾，2年級，只係細哥哥15 個月。細仔性格可以話係同阿哥完全相反！超醒目，做事快手快腳，由歲幾開始發現佢識古惑，而且臭脾氣。同戇居居，天真瀾漫嘅阿哥完全唔同，呢啲係天生性格。

之前提過佢 2 歲時去 Playhouse 畀個大嚿過佢好多嘅墨西哥仔迫埋牆，佢係會推低對方坐響佢上面打佢。佢唔會主動撩事鬥非的，但佢識反抗保護自己。又因為呢件事，我同老公都驚驚哋，唔想佢第時好勇鬥狠，好易出事，我哋開始發力感化佢，重點教番純呢隻癲仔。

經多年來教育，亦有阿哥呢個好榜樣做辨，細細真係由一個癲喪，變成依家一個好淡定好守規矩嘅孩子，我反而覺得佢太怕事添！可以多點為自己發聲。加上佢本身性格 easy going，咩都冇所謂嘅，都幾大量，畀人恰唔會點出聲，又唔會行差踏錯，所以就比較少寫佢。

畀同學偷兩支螢光筆

如果要講細細，呢件事可以討論下。有日放學，細細同我講，話有個同學仔之前坐佢隔離，偷咗細細 2 支螢光筆，一支黃色一支藍色，而家 2 支筆響同學仔筆盒。我問細細，你問佢拎返佢唔畀? 佢點講？細細話，對方話係佢自己嘅！哇，咁都得？？細細想我幫佢拎番，但佢又驚話畀老師聽。咁我就寫咗張 note，叫細細帶返學交畀老師，話畀佢知有呢件事，希望老師可以了解事件，同埋幫細細拎番 2 支螢光筆。

有時呢啲唔係太嚴重嘅事，我又唔想好似要幫佢出頭咁，同時，我希望細細自己去爭取番自己嘅物品，起碼去講，同埋參與解決。 結果，老師 e-mail 番嚟，話問咗細細同該同學，佢哋兩個都堅持 2 支螢光筆係自己嘅！所以老師就決定將 2 支螢光筆擺響老師枱面，佢哋可以自己拎嚟用，細細同該同學都同意，就解決咗呢件事了。你哋聽完，覺得點？有咩意見呢？

在我嚟講，呢個解決方法，我覺得可以接受嘅，但我必須同細細傾番兩樣嘢。第一，我問佢，老師咁樣決定佢覺得點？同唔同意？佢話 OK，冇委屈冇唔開心，呢個我覺得最重要！因為你明知果 2 支筆係你嘅，依家無啦啦畀人偷咗，佢冇被罰之餘，仲可以一齊用？咪講笑啦，我唔會囉！不過我又好欣賞細細咁豁達嘅心態，我覺得冇必要教佢計較，做人太執着係好辛苦。難得佢咁都肯同對方share，畀人恰都冇敵意，唔係人人做到，我有讚佢，我覺得做男人氣量好重要，應該保持。

豁達都要有原則

第二，我同細細講，每個人都會做錯事，都有改過嘅機會。對錯我哋知，佢自己都知。佢做錯事，可能好驚被罰唔肯承認，咁我哋今次就畀機會佢，希望佢會知錯唔好再犯，但如果佢再恰你或者偷你嘢，你一定要出聲，亦唔可以再同意 share 用呢個解決方法。你唔出聲係害咗佢，佢變咗慣犯！

我亦唔會再畀佢咁易過骨，我想知道對方家長係點樣教小朋友。見細細個樣有啲擔心，我就同細細講，我諗佢應該唔敢再犯，因為佢知你會話畀媽咪聽，同埋知道老師會插手，雖然佢以為死口唔認就冇事，但佢太天真喇，只係我哋放過佢，畀機會佢改過。如果佢再犯，即係佢唔知錯，亦冇人教佢，咁佢應該要受教一下，懲罰唔係壞事。

到底藍色同黃色螢光筆有冇機會返屋企？

事後，我有回覆老師 e-mail，既然細細同意呢個解決方法，我冇意見。但請老師幫個忙，學期尾 keep 起 2 支螢光筆畀番我。因為果 2 支筆，係我由大學時 keep 到依家，細細響我文具格拎咗返學校用，我唔想因為咁而冇咗。

雖然唔知老師會唔會真係幫我 keep，或者之後大家用嚟用去都會唔見咗，但個 e-mail 我想表明立場，我可以讓步唔追究，尊重老師嘅決定，同意呢個唔多 fair 嘅解決方法，但都想畀老師知道件事嘅真相，我個仔冇講大話。