當街扭計怎麼辦?

睇到近日幾單小朋友當街扭計，比媽咪殘暴對待既新聞短片，實在十分無奈。老實講，做人父母，有邊個未試過比D仔女激到爆血管? 鬧仔打仔亦唔係新奇事。但大家有無發現，其實鬧完打完，下次咪又係犯同一樣錯！成日咁激動，其實都好無謂。

我覺得點樣先可以等佢記得一次教訓，唔會再犯呢? 個重點就係要佢理解果件事，分析比佢知佢做錯左D咩，如果咁做會有咩後果。小朋友真係需要教，比心機教！

講就易喇！咁響小朋友扭計既時候，點可以咁冷靜咁分析比佢知呢? 拿！呢個係重點！成件事發展成點，係當街打仔講粗口丫，定係個小朋友乖返拖住你走呢? 個問題唔響小朋友身上，係個大人點樣去處理，點樣拆掂單野。我咁講，大家可能會即刻諗，tum佢就佢咪得囉！買糖買玩具，食雪糕...但你諗下，佢扭計，仲要呵返佢轉頭? 咁佢大晒啦，仲使教既?！咁樣解決件事，叫做縱！唔係教！(我見好多人都係咁縱法)

咁講啦，不幸地小朋友真係當街發癲，扭計，大人要不慌不忙，千祈唔好同佢癲埋一份。最基本自己要冷靜先啦。我自己為例，激動時我會合埋眼幾秒，抖幾啖大氣，過下冷河先！之後開始講道理，聽就最好啦，唔聽既話，嘗試帶佢去少人D既地方再教。因為有外人，你同小朋友既情緒都會因為身邊既人而冷靜唔到。講道理呢part無得幫，教仔唔係一朝一夕既事，真係睇你平時點管教佢，佢有幾聽你支笛。好多人就係平時唔教，到小朋友真係當街當巷發癲，大人覺得無面嘛，先至當街大鬧，教比人睇。

我自己都有個小經驗，2年前細細2歲時，我1拖2返香港，出街推車一個揹住一個。2歲呢D真係好難攪，講道理佢未明得晒，佢又未識講野表達情緒。有次搭地鐵去搵朋友，無推車，拖住2個仔。到站時細細唔肯落車，拉住我響度賴死喎！我當時真係合埋眼，抖左2啖氣，我覺得無表情，唔比反應係最好既反應，特別是個環境已經嘈，個細路又嘈，自己就唔好再嘈埋一份喇。

咁到站都要落車啦，我唯有一手打橫抱走佢，一手又拖住呔仔。落左車，細細就爭扎喪喊，唉！唔知以為我拐帶細路！我唯有出閘後擺埋佢一邊，由佢喊，我同呔仔企響對面望住佢，間中走去問佢喊完未，解釋佢聽點解要落車，教到佢知道自己錯，唔應該扭計，先接返佢。係呀，無比耐性架！但佢知道你唔會就佢，知道當街扭計既結果係無人理佢，應該唔會再犯架喇，再犯咪再教囉，點解D阿媽咁長氣，原來係有原因。^^

其實個個小朋友性格唔同，只有自己先知自己仔女適合邊種教法。唔止小朋友每日學習新事物，父母都一直學習點樣教小朋友。父母愛錫仔女，佢地一定感受得到！唔好因為一時情緒，做出傷害佢地既事。加油呀各位！！

**可憐！細細扭計無人理，仲要全部人走晒(喱埋裝佢)！無辦法，唔肯行就自己留響度。結果驚到喊，下次唔好喇知嘛！