童心看世界III

之前寫過兩篇「童心看世界」，真係好鐘意記低佢地用童心去感覺呢個世界既事。我地大人因為好多野響成長中已建立左一個模式，未必可以用另一種心態去睇唔同既事。而呔仔細細既出現，令我發現每件事情其實有好多唔同方向，等於好多人所講，半杯水可以係缺失，亦可以係擁有，在乎你用咩心態去睇。

今次係呔仔做既一張功課紙，我覺得好有趣，同大家分享下。題5，有3幅圖叫小朋友排次序，呔仔排左 2，1，3，即係落緊雨小朋友好污糟，之後跳落水淋雨，然後乾淨晒！而我一見到D圖既睇法係剛剛相反，我覺得係本身小朋友乾淨，然後因為落雨同跳水灘，最後變得污糟晒。不過我無同呔仔講我既睇法，我只係問佢佢既睇法，佢講我知落雨可以沖走污糟，好似落雨可以洗乾淨部車一樣，佢岩喎！而其實，我覺得呢條題目係無岩與錯，只要解釋得到，2種睇法都可行。

平日生活上，我俾好大自由度呔仔同細細去決定自己既事，特別是思想上，我通常由得佢地亂咁諗。當然，嚴重的大是大非，禮貌等等一定會教，不能馬虎，但無傷大雅的事，我唔係執得好正，因為唔想埋沒左佢地既童心，我鐘意佢地天馬行空的思考方式。朋友聽到佢地講野，會覺得九唔搭八，兩個自己講完又大笑一餐，有時旁人唔明佢地講咩，其實我認真聽落去，每件事都有關聯，有舖排的，哈哈！可能我就係一個鐘意創作的人吧！

而呔仔既想法，其實俾到一個好正面既感覺我。佢覺得，落雨係好事，係可以沖洗污糟，而唔係好似我咁諗，落雨係麻煩，係會整污糟個身。天啊！曾幾何時我係一個好鐘意落雨既人，甚至同小學同學一齊淋雨踩水灘，又試過8號風球唔避雨，成套校裙濕晒，覺得好好玩好開心！多謝呔仔，你又令媽咪回到過去了，我真係要繼續向你學習。你知嘛，人大了，好多事都無左個心去感受，所有野都盡量要方便要快，其實企定定停落黎，先可以真正享受生活，你做到了！

延伸閱讀:

童心看世界

童心看世界II