笠水兄弟畢業show

summer 又到喇！又係各大幼稚園舉行畢業禮既日子。見facebook 好多朋友都有uplaod 佢地小朋友畢業禮既相同片段，好開心呢！雖然我人在外國，但見到個個朋友D 仔女都畢業了，上小學，又開始人生另一階段，真係既開心，又感慨日子過得真係太快了。對我黎講更加喇，一年先返香港一次，每次見面班小朋友已經又大一歲，感覺上幾年前大家先睇住大家既小朋友出世，轉眼已經上小學！

香港既幼稚園，畢業禮睇黎比較大型隆重。我地美國呢邊保持住hea 讀風格，連畢業禮都比較簡單，之前影左cap & gown 單人畢業相，呢日就無再著畢業袍了。呔細學校畢業show，低班同學 (細細) 就唱歌跳舞，高班畢業既 (呔仔) 就唱跳再加多一個話劇。雖然簡單，但真係好開心，因為班細路仲好矇盛盛，笑料百出，經常引到成場家長狂笑。除左表演，仲有播畢業同學響學校生活片段同領取畢業證書既環節，之後仲有大食會。

由於呔仔細細只讀到6 月 (佢地學校係year-round 無暑假放) 呔仔9 月開始上小學，而細細就升班，我比佢地放2 個月暑假。所以7 月1 至10 號畢業禮前，我每朝10 點都帶呔細返學校綵排，等佢地練多D。

記得一年半前呔仔入學後3 個月，第一次參加聖誕表演，第一次上台。當時4 歲既呔仔，被安排企正中間，佢由第1 首歌開始大喊，喊到唱完第2首。入後台時我安慰佢，令佢有勇氣面對人群，奇蹟地竟然完成左第3 首歌，仲有跳舞添喎！果晚響發表一段後記，呢件事感動左好多人，包括我自己。

今日又黎到另一次表演，表演前呔仔依舊同我講，佢唔鐘意表演，唔鐘意咁多人望住佢。但我教佢，呢個係team work，係合作精神，係佢呢2年讀書生活中其中一樣要學習既野。呢次表演就係大家合作既成果，只要自己盡左力，跳得唔好都唔緊要，參與先係重點。我仲教佢驚既話就唔好望d人，望住老師，老師會一路陪住大家跳。雖然佢明白，但其實我都諗佢上台時可能齋企。點知今次真係喜出望外，佢有邊跳邊唱，表現得好好！真係大個仔了，我同老公都好感動好為佢自豪！可能對其他家長黎講，呢d 係微不足道既事，但我家呔仔實在太笠水，不愛出風頭，最怕做焦點，最爆係唔鐘意人地望住佢喎！所以佢能夠上台表演成功，仲幾享受咁款，真係令人興奮！

至於一向活潑好動既細細，竟然接哥哥捧，出場時勁笠水，死抓住我。音樂響起時，佢開始呆企扁咀搣手指，我諗佢勁緊張。搣到人地唱完，佢又唔肯行，要我拖返佢走，走漏隻扁咀貓貓，結果又全場爆笑。依隻野綵排時跳得好勁好開心架喎！真係有頭威無尾陣呀！好朋友響facebook 留左一句鼓勵呔仔：一時笠水唔代表一切。我都留番一句比細細：平時唔笠水亦唔代表一切！哈哈！