- motherhood
- by 呔媽Kelly
- 11/10/2017
上一篇：陪仔瞓8年 分房睡的挑戰（上）
上篇講到暑假前開始同兩個仔分房睡，大戰兩個禮拜後終於衰咗，原因我覺得係大仔心理未ready。老公嘅說法係，你唔迫佢，佢幾時都唔會ready！但我一向好相信當小朋友ready，佢係自然會做得到，係自信地愉快地做得到。
爸爸堅持媽咪心軟
冇錯你迫佢，佢係有可能因為驚被罰被鬧，而勉強地做到，但件事嘅原意係大人只想盡快達到自己想要嘅目的？定還是幫助緊小朋友去建立信心，最後佢自己成功地去做到呢件事呢？
情況就好似小朋友戒片，好多人會想盡辨法要佢地盡快戒，冇諗過 2 歲嘅小朋友，膀胱肌肉都未控制得好，想痾就痾好正常，但就迫佢地忍，瀨咗就罰，同樣係大人想盡快達到目的，而唔係小朋友ready去戒片。
好朋友同我講佢個女 4 歲，每次瀨尿都好驚好唔開心，身邊家人仲醜佢笑佢，我聽到真係好嬲！4歲瀨尿有幾奇？
我仔8歲仲偶然會失手，飲多咗水冇去廁所就睡，瀨尿好正常。可能大家唔知隨口一句對小朋友影響幾大，但呢啲心理壓力係對小朋友精神虐待，我睇得好嚴重。
大仔失眠自言自語，嚇壞媽咪
講番初初果兩個禮拜分房睡，我幾崩潰！自己不捨嘅感覺我已置之道外，個問題係大仔根本未準備好，老公就不停迫佢鬧佢。
其實咁樣真係好唔健康，有好多晚大仔好驚自己睡不着，走來叫我又被爸爸發癲鬧，差啲拖佢出車房鎖門禁錮，搞到佢又唔敢行來搵我。
然後我聽到大仔自己一個人，響隔離房同自己講嘢喇喎！內容大致係話自己點解咁冇用，點解睡極都睡唔着，點解細佬就睡得咁好，係咪會永遠眼光光，總之就一直自言自語。
我真係好驚佢精神出現問題，因為你永遠唔會知道一個人，一個小朋友能夠承受幾重壓力，到某個位精神錯亂，佢就唔會走得番出黎，即係黐咗線！
我哋成日話，唔好用自己把尺去度人，你覺得容易嘅事，佢可能呢一世都做唔到！唔好話小朋友，大人都唔係人人一樣能力，每個人都有弱點架！
嚴重失眠兩星期我地變晒疆屍，我決定要同番啲仔睡，加上就嚟 Summer 返香港，都係兩張大床一齊睡，就由佢地繼續黐多陣，放完假返美國再慢慢訓練吧！
到上個月返番美國，我就同大仔講，叫佢自己開始試下，唔得就嚟搵媽咪攬返住，唔使擔心，我地有大把時間準備，分房睡呢件事係冇限期的，我地只係試下，當中亦有不停的鼓勵，同埋做啲令佢放心安心的事。
唔知係咪佢覺得咁樣好安全，隨時可以搵人救，心理壓力消失了，就由一開始幾晚有行嚟搵下我哋，到慢慢佢自己能夠一覺睡天光。就係咁，就快 9 歲嘅大仔，竟然真真正正自己睡了！
世事就係往往咁奇妙，而我地完全冇諗過會咁容易成功的，仲諗住有排打仗。
而我，仲係處於失戀狀態，仲係好不捨，但佢地已經向前行了，我又唔好將佢地拉返轉頭吧！做媽媽最難學的，其實是放手。
