訓練小孩輸得起

當家長各出奇謀去‘赢起跑！赢獎項！赢證書！’既同時，赢，已經成為小朋友成長既重要部份。記得小時候，參加一個校際畫畫比賽，評判選出冠亞季軍加多一個優異獎。當時得到優異獎既我，興奮莫明！自此亦愈來愈比心機畫，覺得真係有人會欣賞自己畫既野。而由於二百幾人參加只有4人得獎既關係，無得獎既同學亦唔會太介懷，不求獎項(都預左無)，大家志在參與。

反觀現今教育既比賽模式，小朋友參加比賽，一百人有一半係有獎項，剩低果一半又有安慰獎架喎！所有得獎既麻煩交100蚊獎項費丫！咁得意都有既? 用錢買張獎狀返黎，咁比賽既真正意義何在呢?? 唔止私校係咁，就連屋村學校，都講緊只要有做，就算hea做都會分個豬肉獎比佢，否則D家長會投訴。

赢，當然好啦！有邊個唔識得享受赢既感覺，但輸，就未必人人輸得起喇。所以響教小朋友既過程，我覺得點樣教佢輸得起，其實係更重要既一環。

前晚第一次教呔仔玩UNO，佢好有興趣，好快學識點玩。玩得兩舖，我發現佢比我罰牌既時候會唔開心，輸既時候會接受唔到，會扁咀谷眼淚。但開心既係佢輸左之後要求繼續玩，唔會話一輸就放棄。由於我從未同佢玩過呢D有輸赢既遊戲，我唔知道原來佢會有咁既反應。當下一刻我都有諗，我係咪應該讓佢，等佢玩得開心D呢? (老實講我見到佢赢果個樣，其實我比佢更快樂！我見到佢輸左谷眼淚，我有D心痛。) 但好快，我諗到呢個係關乎佢長大後可否面對失敗既時候，我就狠心地罰佢牌，由佢輸，等佢明白人生就係有輸赢，即使只係遊戲，都要公平競爭。

一個人唔會永遠赢，亦唔會永遠輸。當佢唔接受罰牌時，我會停止遊戲，直到佢可以遵守遊戲規則，先再開始。期間一直教佢，輸赢其實並唔重要，最重要係享受玩既過程，自己盡左力，就算輸都開心左，學多左應該點樣出牌啦，咪期望下一舖會赢囉！

結果玩左好多舖之後，已經見唔到佢D眼淚，無再偷偷收起兩隻(+4)既牌。開始享受遊戲，無再咁計較輸赢得失。有D感動，自己無因為一時心軟而錯失左訓練佢‘輸得起’既機會。

玩前係咁既樣……

輸左係咁既樣……

仲識笑，不過眼有淚光……

赢左係咁既樣！！

被勝利沖昏頭腦的人！！