除咗呂麗瑤之外，可能響唔同界別都有發生同類事件，如果受害人唔怕控訴，就可以將犯人繩之於法

早前寫過一篇關於Speak Up嘅文章，內容講到被欺凌時一定要為自己發聲，然後我講到以前在香港工作時，經常響地鐵捉啲咸濕佬非禮女仔，而啲女仔大多數係唔敢出聲的，而我會大大聲阻止，問個男人行咁埋個女仔想點之類。(相關文章：從小學習Speak Up(下) 「多一事不如少一事」想法要不得   http://bit.ly/2x2fWHg) 。

文章出街後，有女網友私訊我，講番佢當年搭巴士被非禮嘅事，當時佢鼓起勇氣報警，而因為要等警察來捉人，巴士要停埋一邊，點知有個師奶鬧呢個女網友自私，阻住成車人返屋企。女網友話身為女性，被非禮已經又驚又反感，鼓起一剎那嘅勇氣報警，竟然換來指責，真係非常難受！

佢同我講，當佢同女性朋友提及呢件事時，原來大家都習慣被非禮，亦習慣了啞忍。最後，佢多謝我寫咗一篇叫大家發聲嘅文章，希望改變到一啲人嘅諗法，同埋呢種咁扭曲嘅社會風氣。

網友來信有洋蔥

我睇完佢呢個訊息，鼻酸酸，心情好沉重又好憤怒。呢個社會幾時變到咁樣，人變得自私冇同理心，如果被非禮嘅係師奶自己個女，佢係咪仲咁趕住返屋企呢？點解受害人會變成罪人？我亦唔知原來咁多女仔都在啞忍，點解咁憤怒都唔出聲仲要啞忍呢？由細個我地接收嘅信息係，女仔人家被非禮被強姦，係一件無面嘅醜事，最好唔好比人知，更唔好要話報警處理。

可能舊年代女性地位低，地位底就做咩都錯，更徨論為自己發聲。但於今時今日嘅社會，女性地位已經好高，我地有權去捍衛自己，為自己認為啱嘅事發聲討公道，根本唔需要理會旁人指責，佢地亦冇權阻止。

啞忍只會助長歪風

近日一名香港跨欄女子運動員呂麗瑤，響 Facebook 出咗個 po ，講述佢10年前被一位佢尊敬嘅前教練性侵犯。前教練利用呂麗瑤對佢嘅信任，對當年只得 14 歲的她作出性侵。自己做人父母，14歲女仔，響我地眼中其實仲係一個小朋友，發生呢啲事，真係會唔識處理，亦唔敢同人講，結果一忍10年。

呂麗瑤希望喚起大家關注兒童性侵，鼓勵不幸嘅受害者勇敢發聲，同時希望大家明白到性議題並唔係尷尬、羞恥，或不可公開的。佢希望事件被廣傳，令更多人知道 及防止呢啲事發生。佢講得冇錯，罪犯就係恃住受害人唔敢出聲，害怕被討論，就肆無忌憚犯案。如可改變社會風氣，支持女性為自己發聲，唔會啞忍，亦唔怕開口討論，咁肯定對呢班蝦女人嘅衰人有阻嚇作用，令佢地唔敢咁猖狂！

今次呂麗瑤願意踏出呢一步，為女性 / 兒童權益爭取一啲關注，的確令人佩服，大家應該支持。試想想，除咗佢之外，可能響唔同界別都有發生同類事件，如果受害人唔怕控訴，將犯人繩之於法，咁可以大大減低其他人受害嘅機會。如大家願意，可到呂麗瑤的 Facebook Page表示支持及 share 文章，令更多人知道及關注事件，為自己女性權益做多一點。

呂麗瑤 facebook：https://www.facebook.com/laiyiului/

呔媽其他精采文章：

從小學習Speak Up(上) 就算未必成功都要爭取！  http://bit.ly/2x2T1vp

從小學習Speak Up(下) 「多一事不如少一事」想法要不得  http://bit.ly/2x2fWHg