呔爸做左好市民

話說上個月，老公響Union Square附近開緊OT，迎面而來有2個肥黑人向佢地呢team開緊工既人跑過黎。而肥黑人身後就有一個白人男子同一個黑人女子窮追緊，大叫佢地搶左人手袋！而追賊男女見賊人比成team人圍住，亦放慢腳步，有人接左捧可以抖抖~

賊人見勢色唔對，就響個袋入面掉返佢搶既手袋出黎，諗住鬆人！唔知係咪大家都覺得個手袋已經拎返，定係開緊OT已經攰到得返半條人命，佢地逃走竟然無人阻止！當時老公就喝住叫佢地唔可以走，人地當然啋你都傻啦，唔通企定定等比人拉咩~ 就係咁佢地跑左上架巴士，而老公亦追住佢地上巴士，叫巴士司機lock門唔好比佢地落車！好快警察就到，落完口供散水。件事就係咁~

上星期收到警局通知，老公同另外2名捉賊男女，將獲頒予「好市民獎」，表揚大家見義勇為~ 不愛出風頭既weak7諗住唔去(好明顯係笠水 xD)，點知遭到同事們白眼，hahaha~ 可能響美國人眼中呢個係個殊榮，亦係警局對市民既尊重，所以叫佢一定要去~

反而我地其實對呢件事唔係太過上心，其實幫人係件好平常既事，幫手捉賊亦係個人正常反應。我初頭都叫佢自己去，不過呔細一聽到話有警察獎勵爸爸，以為有得參觀警察局，猛話要一齊。點知去到原來係個議會，仲要唔比傾計，悶到佢地發慌，哈~ 就係咁，響老公領獎既時候，我同佢地企左響門口食叉燒飽(所以遠影D 相好濛)。

但我聽到老公響台上面講左幾句，大約係話，今次其實只係做左佢認為係岩既事，同埋想做一個好榜樣比2個仔睇，希望佢地長大後做個好人，熱心助人。我覺得我老公呢番說話好型呀﹗﹗

weak7話呢張相似係佢比警察拉左，響犯人欄比人審緊 xD

老公出到黎既時候，被星島日報同世界日報既記者訪問，講返件事既經過。不過2篇剪報我唔PO喇，響晒全朵再加大大隻字「見義勇為」(可能大家中國人尊登幫手表揚下)，此事實在太爆喇﹗都係唔好嚇親街坊，哈~