改善黑眼圈有法

上一次我 Poppymama 分享過遮唔同類型黑眼圈嘅方法，但各位靚媽們咁忙碌，又要返工湊仔，又要處理家頭細務，唔係個個會得閒日日化妝遮住對熊貓眼。成日化妝嘅職場媽媽們有時亦想俾皮膚抖下氣，而且化妝始終治標唔治本，唔想素顏睇落好無精神成隻熊貓咁？可以嘗試跟住以下方法來做，至少都可以減淡改善黑眼圈嘅問題！

1）生活習慣方面：眾所周知，後天引起熊貓眼嘅其中一個原因係睡眠不足，過度疲勞，引致眼底血液供氧不足，嚴重影響眼部循環，而吸煙、酗酒、營養不良、鼻敏感等，都會惡化黑眼圈問題，所以要保持充足睡眠，減少接觸引起鼻敏感的至敏原，配合規律的生活同均衡飲食習慣，多吃蔬果抗氧化食物，先至係改善黑眼圈嘅首要條件。

2）使用護膚品方面：眼部肌膚非常脆弱，是最易產生細紋，皺紋同敏感嘅部位，而老化鬆弛，會令熊貓眼望落更嚴重！要預防老化，除左塗抹眼霜，敷眼膜之外，亦要注意塗上適合嘅防曬，避免紫外線破壞眼部彈性纖維蛋白流失及令角化形成色素沉澱。而挑選眼部護膚品方面，我建議選擇購買大品牌及美容院專業品牌，因為品牌有一定資源投放在研發產品方面；也可選擇有機品牌ECO認證嘅眼霜，因其活性成份較高，效果會比較明顯，而且減少敏感情況出現，同時油性及脆弱皮膚亦要避免使用油分或活性太高的產品，以免出現油脂粒或敏感。左旋維他命C有助抑制黑色素形成，刺激膠原蛋白增生，可以令眼皮回復彈性和減低眼睛周圍產生皺紋的機會，對兩種黑眼圈都能夠起改善作用；維他命K能夠強化微絲血管壁，防止及減少因微絲血管破裂而引起的青眼圈；而維他命E也可以加快皮膚的新陳代謝及延緩老化問題，挑選護膚品時可儘量㨂選含有以上成份的眼霜。

3）熱敷可以加速眼部血液循環，從而改善後天引致嘅熊貓眼，現在市面上有些眼部熱敷蒸氣貼也有幫助，此外，亦可以配合儀器導入，例如美容院或家用RF 射頻，利用聲波及振動，透過高頻率，深層熱力等原理，更快速及明顯地幫助眼部血液循環從而改善黑眼圈。

冰封三尺非一日之寒，護膚係一個循序漸進嘅過程，雖然熊貓眼唔易改善，但俾多少少耐性，長期keep 住跟以上嘅方法來做，相信趕走黑眼圈吾再做熊貓 is possible!