10點後復活！！

有左小朋友呢幾年，每日都過得好充實。由一早起身擘大對眼開始，就係湊仔同湊仔。當然有放小息既時候，但我唔可能做到自己既野，因為我好怕做做下野既時候比人打擾，特別係寫書，做設計之類。

以為呔仔細細返左學，會輕鬆D嗎？唔會喇，因我由全職湊仔婆，正式轉職為全職湊仔煮飯婆！送完仔返學，就要去買菜諗定晚餐食咩。同時又唔好以為仔大左，又會輕鬆左喎！因為中午放學後，佢地又會想去公園啦，圖書館啦，食Tea啦...返到屋企做陣功課，又開始煮晚飯，全日就係咁樣過。雖然每一日做既野都差不多，但佢地經常笑料百出，陪住佢地成長真係好開心。

小朋友大一日就係一日，我唔願意分薄比佢地時時間去做自己既野。結果呢幾年我同朋友whatsapp講得最多既係:「我暗仔先！10點後搵你！」

呢個10點後復活，對我黎講真係非常重要，佢可以平衡我每日湊仔既單一生活。我可以敷mask啦，同frd吹水啦，睇新聞啦，online shopping啦，寫書寫卜做design啦，甚至乎睇返套戲，總算叫做過返D正常人既生活！哈。

而我相信10點後復活呢一群，應該為數不少！好多父母同我一樣，D細路訓左呢幾個鐘係每日最relax既時候，係我地時黃金時間！咁呢幾個鐘，你地又會做咩架呢?? ^^