呔仔哮喘、細細濕疹，呔媽都唔當一回事，最近又有難關要過……

如果你問我我兩個仔易唔易湊，我諗我仍然會答:好容易！我覺得小朋友容唔容易湊，其實好取決於父母嘅心態。同一件事，你用最複雜最難搞嘅方式去做，定還是用最簡單直接嘅方法完成佢? 我一定係後者，我係做任何事都要快靚正嘅人。

性格冇得變，套用於湊仔方面，我都係行緊自己呢一套，可能就係身教吧，父母唔係麻煩友，小朋友都唔會麻煩得去邊，因為佢地連講句說話都係學父母的，你做事方式易話為，佢一定會照跟。

其實湊仔呢，真係唔困難，最緊要唔好自己嚇自己。聽過好多人，個肚都未大，已經擔心九萬幾樣嘢，好似有咗小朋友之後個天會跌落嚟咁！咁樣嘅心態，一定難湊，因為未開始已經咁恐懼，到BB出咗世，又再多九萬幾樣嘢擔心，你話點可以放輕鬆？你唔放輕鬆，小朋友咪同你一樣事事緊張，咩都驚餐飽，惡性循環。

再講，湊仔嘅嘢，你點樣擔心緊張都冇用，因為未到果一刻，你根本唔會知道你要打邊個大佬。有問題出現，發現時一定晴天霹靂，但接受了就樂觀地面對，搵方法去解決。好似我湊仔咁，大仔細仔輪住嚟，關關難過關關過！

細佬好彩喎，咁多年，係頭一年濕疹爛到全身出水出血，捱過咗喇，依家只係爛手指啲關節，愈大愈好。反而大仔好多事，2-3歲時開始哮喘，頭兩年一入冬，晚晚要吸豬鼻聞氣，要嚟擴張氣管，預防哮喘發作。大大下，氣管鬆啲，加上游水，6歲咗右哮喘斷了，而家天冷食雪糕飲凍嘢都冇事，恭喜佢啦！

然後佢由細講嘢唔清，唔識舌頭擺位，佢情況嚴重到啲朋友聽唔明佢成句講緊咩。然後4歲左右，佢明白同識聽指令，坐得定喇，我就每個星期帶佢去語言治療，加上響屋企每晚同佢練習，幾個月後佢開始講到某啲音，就一路講得番清楚喇，又恭喜佢啦！中間啲小事唔逐樣講，到3年前返小學前，佢又嚟喇喎，今次出現嘅係抽動症…

關於呢個兒童抽動症（Tic disorder），當時都響度都寫過 >> (兒童抽動症) ，近日又發作喇，下篇文章再跟進吧！

我只想表達，經歷咗咁多問題，佢地咪又係一樣健健康康快高長大。而我亦認識唔少父母，小朋友完全冇病冇痛，所有嘢都正正常常嘅，佢地同樣係覺得好難湊好難搞，不停呻辛苦。其實湊仔容唔容易，都係在於我地自己心態放輕鬆，屋企保持愉快氣氛，小朋友就自然容易湊了。