我願意！！

有時唔相熟既朋友聽到我響讀緊大學既時候結婚，陀住呔仔畢業，都會問我係咪有左先結婚? 其實唔係啦，所有野都係按我地計劃進行，只係我既計劃，可能響別人眼中有D古怪，但我從來唔鐘意計得太清楚既計劃。幾多歲結婚，婚前要買樓，婚禮要點攪，幾多歲生仔，個仔又要點點點...呢D 完全無響我身上發生過。我諗好多Blog 友都唔知道，我地當年結婚既目的，其實係為左生仔，哈！好幸運，婚後1個月就有左肥呔了！

早排有個服務機構搵我寫左篇關於愛情既文章(未出街)，義務的，我一口答應了。個機構新增左一條愛情輔導服務，幫助感情失敗既朋友。我覺得好有意義呀，所以幫手寫左段稿。內容大致係講下我自己既愛情觀，當然我唔係話自己愛情好成功，我都有失敗既時候，但就係經歷失敗，令我對愛情有唔同既睇法。

我係一個相信愛情既人，我覺得2 個人相愛就可以結婚架喇！愛情對我黎講，心靈上既滿足遠勝於物質。婚姻，就係甘苦與共既承諾，即使結婚當時無車無樓無番狗，只要大家相親相愛，一樣生活得好快樂！其他野都係附屬品，有咪好囉，無都無影響。做比人睇既野更加唔需要，因為幾盛大既婚禮，都唔夠同一個原本三九唔識七既人」甘苦與共」咁壯烈卦?！既然咁勇猛，同佢行得呢一步，都已經豁左出去啦，又何必計較其他小節呢！

記得拍拖時同我老公講過﹐無論將來係點﹐只要兩個人一齊﹐就算困境一樣可以捱過去﹐本來都係無一物架啦。結果由零開始到今日生活安穩﹐老公擔起頭家﹐養到我地肥肥白白﹐兌現左結婚當日既承諾﹐真係好感動呀﹗要維持一段關係﹐我覺得識得欣賞對方係好重要。佢對屋企付出﹐為我地做既每件事﹐我都感激。一齊8 年喇﹐我仍然愛佢像最初﹐我相信佢都一樣既﹗有問過佢﹐做咩咁鐘意我呀? 佢話佢自己細個行差踏錯﹐唔識諗喎﹗估到佢會咁講啦﹗haha~